طريقة صيد سمك المياس

معادنا النهاردة مع سمكة مش كل الصيادين بيعرفوا يصطادوها
لانها صعبة وبتحتاج مجهود وصبر كبير
معادنا النهاردة مع
المياس

نبتدي على بركة الله
موسم المياس
المياس موجود طول السنة ولكن بيبقى كتير في الربيع والصيف
وفي الشتاء موجود بس قليل

اوقات صيد المياس

من العصر لغاية بعد غروب الشمس بساعة تقريبا
ومن قبل الفجر بساعة لغاية شروق الشمس

مش معنى كده انه مش بياكل باقي اليوم
لا بيبقى موجود بس قليل جدا
انا عن نفسي لما بنزل على المياس بنزل من الساعة 12 بالليل لغاية 7 او 8 الصبح واكبر مياسة جيبتها كانت 4 كيلو تقريبا وجيبتها الساعة 1 ونص بالليل
معنى كلامي ان فيه اوقات معروفة السمكة بتاكل فيها لكن ممكن السمكة تاكل في اي وقت لو موجوده
وكمان مش معنى ان المياس بياكل في اوقات معينة يبقى لازم تاخد منه لا ممكن ماتاخدش منه ولا سمكة مع انه بيكون في الموسم بتاعه وفي الوقت بتاعة

طرق صيد المياس

اللي اعرفهم من طرق صيد المياس طريقتين
الاولى ودي بتكون من المراكب ومش اي صياد بيستخدمها لانها صعبة و الهواة اللي زي حالاتنا مش بيستمتعوا بيها لان الهدف منها بيكون كمية السمك مش مجرد الصيد للمتعة
وهي
غزل السنار
وده بيكون شعر نمرة 100 او 120 وطولة ممكن 200 او 250 متر وبيربطوا كل 2 او 3 متر سنارة كبيرة شوية في سلك مش شعر عادي وبين كل سنارة والتانية يحطوا رصاصة ويطعم في كل سنارة سردينة كاملة او نص سردينة ويفرد الشعر في المية ويسيبة من بالليل للصبح ويرجع يلمة وزي ما ربنا يرزق بقى

نيجي للطريقة التانية اللي كلنا ممكن نعملها

البوصة والماكينة
قبل ما نبتدي نصطاد مياس لازم نعرف ان المياس من الاسماك اللي بتاكل اسماك واللي شاف المياس قبل كده يعرف ان ليه اسنان حادة جدا يعني الشعر العادي ماينفعش معاه لانة ببساطة سنانة عاملة زي الموس فتخيلوا لو انت عديت بالموس على الشعر ايه اللي حيحصل ؟؟
علشان كده بنستخدم سلك صلب
والسلك ده انا عن نفسي اتعلمت ازاي اعمله بس لو تشترية بيكون اسهل بكتير ومش غالي
وهو بيبقى عبارة عن سلك مجدول طولة حوالي 20 سم وملحوم فيه سنارة كبيرة بتكون 05 او 04 على حسب ما انت تختار

حتحتاج كمان بوصة تكون قوية جدا لان مقاومة المياس جامدة انا عن نفسي مش بصطاد المياس الا ببوصة بامبو عاملها على ايدي من اول ما جيبتها خام وقطعتها وحمصتها لغاية ما بقت بوصة يعتمد عليها وهي بوصة حتة واحده 5 متر
مش معنى كلامي ان البوص الفيبر ماينفعش
لا
بس لو بوصة انت واثق فيها
المهم
الشعر اللي حنستخدمة هو الشعر العادي يعني 40 او 50 مش محتاجين شعر جامد لان السمكة مش حتوصلة

الرصاصة متوسطة الوزن

نيجي دلوقتي لاهم جزء في صيد المياس
وهو
الطعم
زي ما قلنا المياس بياكل سمك يبقى احنا لازم نصطاده باللي هو بياكلة
ممكن تجيب سردين من السوق وتشتغل بيه
ولكن
انا بفضل اني ارمي بسمكة من المية اللي حرمي فيها
بمعنى
اني ممكن ارمي بمرمارة او شرغوش او موزة ومش حتصدقوا اني مرة رميت بدنيس بس كان يستاهل
وممكن انك تاخد البوصة العادية معاك وتطلعلك مرمارتين وتحطهم في جردل مية وتشتغ بيهم

نيجي دلوقتي
لطريقة التطعيم
فيه طريقتين
اما انك تعمل السمكة شرايح وتدككها في السنارة عادي جدا بس الطريقة دي مش بتخلي الطعم يعيش معاك كتير في المية لان صيد المياس زي ما قلنا محتاج صبر يعني ممكن ترمي وتقعد جنب البوصة ساعتين تلاتة لغاية ما حاجة تضرب
الطريقة التانية للتطعيم ودي المفضلة عندي وهي انك تصطاد بالسمكة كاملة
وعلشان تحط السمكة كاملة يبقى قبل ما تحط السلكة في الشعر لازم تطعم السمكة وطريقتها سهلة جدا
السلكة ليها طرفين الطرف الاول بيكون فيه السنارة والطرف التاني اللي بنركبة في الشعر
احنا بقي حنجيب السمكة اللي حنستخدمها كطعم وندخل الطرف الفاضي من السلكة في فم السمكة وتعدية بالراحة داخل بطن السمكة لغاية ما توصل للفتحة اللي في بطن السمكة وتطلع السلكة منها وتعديها وتخلي الداير بتاع السنارة طالع من فم السمكة وتيجي عند ديل السمكة وتربطة بحتة شعر مع السلكة علشان تبقى محكومة كويس وانت بترمي

توكلنا على الله ورمينا
نصيحة لكل اللي عايز يصطاد مياس لازم تفتح وش الماكينة على الاخر علشان لو السمكة شدت ما تكسرش البوصه

المياس بياكل ويشد ودايما بيجري لجوه يعني لازم تديلة براح في الشعر وسيبه يجري براحتة حيتعب ويقف وزي ما قلنا انه مقاوم عنيد جدا بس لما بيتعب بيسلم فماتحاولش انك تتعافى عليه لاني للاسف بشوف ناس بترمي على المياس وفاكرين ان كل ما تكون السمكة قوية يبقى لازم انت تكون اقوى
وانا بقولكم ان كل ما كبر حجم السمكة كل ما كان لازم تكون انت ارق والين على السمكة وكل ما قاومت السمكة لازم تضعف قدامها علشان تقدر تطلعها

اول ما تشدك المياسة افتح القلاب بتاع الماكينة وسيب الشعر حر على الاخر تاخد منه زي ما هي عايزة لغاية ما تقف بعد كده تقفل القلاب وترد في السمكة بكل قوتك لان فم المياس قوي جدا فلازم تتاكد ان السنارة غرزت فيها وعيش واستمتع بمقاومة المياس الجميلة

وربنا يكرمنا جميعا

نصيحة اخيرة
خلوا بالكم لما تطلعوا المياس وانتو بتسلكوا السنارة لان لا قدر الله لو السمكة قفلت بقها على صباعك ممكن تقطعه

والى اللقاء مع سمكة تانية

ايوة عرفها السمكة دى
مش دى الى المطرب برعى بيغنلها ويقول
قدك المياس يا عمري
ههههههههههههههههههههههههههه

» طريقة صيد سمك الموزه
» طريقة صيد سمك الزنجاريا
» طريقة صيد سمك البوري
» طريقة صيد سمكة البطاطا
» طريقة صيد سمكة القاروس