طريقة صيد سمكة البطاطا

سمكة البطاطا

طريقة صيد سمكة البطاطا 459406745

مش عارف ليه سموها بطاطا بس في الخليج اسمها الصافي
وهي من اسماك البحر الاحمر والخليج
وعبرت للبحر المتوسط من قناة السويس
زمان على ما اتذكر ان الموسم بتاع البطاطا كان اول يوليو لغاية اخر اغسطس بس
بس دلوقتي موجوده طول السنة
موسم التفريخ بيكون في بداية ابريل
وهي سمكة نهارية يعني مش موجوده بالليل
الطعم المفضل
اولا العجين
سواء عجينة عيش او دقيق
المهم انها تكون عجينة ناشفة

ثانيا الجمبري (البرغوت)
انا ليا طريقة خاصة مع البطاطا
اني ازفر بعيش واصطاد ببرغوت
وازفر معناها اني ابل العيش لغاية ما يبقى مفرول وابتدي ارمية في المية على شكل كورة
ثالثا الخضرة الشعر
بس من ساعة ما حصلت التوسيعات في الكورنيش قلت جدا الخضرة على البلوكات علشان كده مبقاش حد بيستخدمها كتير
من حوالي 15 سنة كده كانت الخضرة اولا

نيجي دلوقتي مع طريقة الصيد
صيد البطاطا بيكون بالبوصة اليد مش الماكينة
مع العلم ان فيه ناس اصطادتها بالماكينة بس صدفة

فيه كذا طريقة لصيد البطاطا بالبوصة
اولا
بالفلة او الغماز او العوامة
الشعر او الخيط الاساسي يكون نمرة 25
والفروع نمرة 20 او 18
بس نمرة 18 مش بيستخدمة الا الخبير لانة ضعيف
ومعروف عن البطاطا انها سمكة قوية وخصوصا الاحجام الكبيرة

السلاح او السنارة نوعين
اما السنارة العادية وتكون نمرة 20 او 22 او 24
ونمرة 24 تسمى رجل الدبانة وتخيلوا حجمها

او الشلاليط وهي سلاح من 3 سنانير ملحومين في بعض زي الهلب
المهم
الفروع تكون قصيرة يعني بالكتير 20 سم

الفلة صغيرة والرصاص او التقل خفيف

العيار (ارتفاع الفلة عن الرصاص ) يكون حوالي ثلثين ارتفاع المية عن الارض
مع الوقت وخبرتك في المكان حتعرف المية عمقها قد ايه

حط العجينة وارمي
اول ما الفلة تغمز نص غمزة الطشها وادعيلي

ثانيا
الصيد من غير فلة (حساس)
وهو نوعين
طريقة اسمها الربع او المشنقة
وهي طريقة مش كل الناس بتقبل عليها لانها متعبة شوية

الشعر زي ما اتفقنا 25
طول الشعر حوالي ثلثين عمق المية
يعني لو بترمي على قرار 3 متر يكون طول الشعر 2 متر
ويفضل استخدام بوصة قصيرة نوعا يعني 4 او 5 متر

السلاح مكون من 6 او 7 سنانير
كلهم نفس الطول اللي هو حوالي 5 سم تحت الرصاصة
ما عدا 2 منهم بيكون طولهم 10 سم
حجم السنانير يكون كبير مثلا نمرة 16 او 14
الرصاص شريط وثقيل يعني لف ثلاث او اربع لفات كده
حط العجينة على الرصاصة ونزلها المية حتلاقي الوحوش بتشدك
الطريقة دي بنستخدمها للبوري برضة

الطريقة الثانية في الحساس هي السبحة
وسموها السبحة لان عدد السنانير بيكون كتير وفوق بعض زي شكل السبحة
ودي بيكون فيها طول الشعر زي طول البوصة
نحط رصاصة بلحة نمرة 1 في اخر الشعر من تحت
وفوق الرصاصة نربط من 7 ل 12 سنارة
الفروع طولها حوالي 10 سم
حط عجينة او جمبري ونزلها المية
حتلاقي وحوش تانية بتشدك برضه

دلوقتي نيجي لافضل اماكن تلاقي فيها البطاطا
حتلاقيها في البحر في اي مكان
بس فيه اماكن مشهورة بالاحجام الكبيرة
السلسلة
لسان الجامعة
كليوباترا
سيدي جابر
لسان جليم الثاني
سان ستيفانو
امام المحروسة
المنتزة
ملحوظة هامة:
احذروا اشواكها لانها بتسبب الم رهييييييييييييب
ارجو اني اكون وصلتلكم المعلومة بشكل واضح
وارجو اني مكونش طولت عليكم ولا اكون نسيت حاجه
اللي عنده اي تعديل ياريت يعدل عليا علشان كلنا نستفيد

طريقة صيد سمكة البطاطا 2458693997_77a0e1a122_o

طريقة صيد سمكة البطاطا 2459581368_3b06de9ebf_o

بجد نااايس حسن انت اكتر انسان نستفيد
منه فى موضوع الصيد دا لانى
عارفه انك بتحبوا جدااااااااااا
تسلم ايديك I love you

طريقة صيد سمكة البطاطا 2458745909_e4bb41751f_o

يمكن اسمها سمك البطاطة علشان شكلها شكل البطاطة
او يمكن الطعم
بس معلومات جامدة تسلم ايدك

» طريقة صيد سمكة القاروس
» طريقة صيد سمكة الشراغيش و التيس
» طريقة صيد سمك المياس
» طريقة صيد سمك البوري
» طريقة صيد سمك الموزه